24 iyun 2022-ci il tarixdə Şəki şəhərində Azərbaycan Oftalmoloqlar Cəmiyyətinin IX Regional konfransı keçirildi.

24 iyun 2022-ci il tarixdə Şəki şəhərində Azərbaycan Oftalmoloqlar Cəmiyyətinin (AOC) və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə “Azərbaycanın Regionlarında oftalmoloji yardımın optimallaşdırılması” mövzusunda lX Regional konfrans keçirildi.

Konfransda Bakıdan və bir çox regionlardan mütəxəssis və alimlər iştirak etdi. Konfransın keçirilməsində məqsəd oftalmologiyada baş verən yenilikləri, aktual məsələri müzakirə edərək Azərbaycan oftalmologiyasının həmçinin region həkimlərinin inkişafına dəstək olmaqdan ibarətdir.

Konfransı giriş sözü ilə Azərbaycan Oftalmoloqlar Cəmiyyətinin sədri, Akademik Zərifə Əliyeva adına Milli Oftalmologiya Mərkəzinin direktoru, Prof. Elmar Qasımov açdı və konfransın keçirilmə məqsədindən, oftalmologiyanın inkişafı ilə bağlı görüləcək işlərdən bəhs etdi.

Konfransda həmçinin Prof. Kərəm Kərimov, Prof. Paşa Qəlbinur, t.e.d. Namazova Hicran, t.e.d. Nazilə Rüstəmova, AOC-un elmi katibi Dr. Ceyhun Nəzərli, Dr. Xəlil Hüseynov və Müasir Oftalmologiyanın İnkişafına Yardım birliyinin sədri Dr. Emin Əlihüseynli iştirak edirdi.

Konfransda AOC-un sədr müavini, t.ü.f.d. Abdıyeva Yazgül tərəfindən “Azərbaycan Oftalmoloqlar Cəmiyyətinin 5 illik fəaliyyəti və gələcək planları” mövzusunda çıxış səsləndirildi.

Müxtəlif məruzələr dinlənildi, müasir oftalmologiyanın bəzi problemləri barədə maraqlı müzakirələr həyata keçirildi. Konfrans istər elmi, istərsə də zəngin sosial proqramı ilə iştirakçıların yaddaşına həkk olundu.