Akademik Z. Əliyevanın anadan olmasının 100 illiyinə həsr olunmuş XV Azərbaycan Gənc Oftalmoloqlar Konfransı və Azərbaycan Gənc Oftalmoloqlarının I Forumu – “GOK-2023”
İlk dəfə 2006-cı ildə keçirilən Gənc Oftalmoloqlar Konfransı (GOK) artıq 15 ildən artıqdır ki, mütəmadi olaraq təşkil edilir. İllər öncə bu konfranslarda gənc oftalmoloqlar qismində məruzə edən məsləkdaşlarımız bugün artıq öz sözünü demiş mütəxəssislər kimi fəaliyyət göstərir, dünyanın müxtəlif ölkələrində keçirilən beynəlxalq tədbirlərdə iştirak edərək vətənimizi, vətənimizin oftalmologiya elmini və ən əsası hər zaman bizə dəstək olub, yol göstərən dəyərli müəllimlərimizi layiqincə təmsil edirlər. Bu gözəl ənənə ölkəmizdə gənc oftalmoloqların peşəkar inkişafına olan xüsusi diqqətin bariz nümunəsi olaraq yenə də davam etdirilir.
24-25 noyabr 2023-cü il tarixlərində Akademik Z. Əliyevanın anadan olmasının 100 illiyinə həsr olunmuş XV Azərbaycan Gənc Oftalmoloqlar Konfransı və Azərbaycan Gənc Oftalmoloqlarının I Forumu keçiriləcək. Azərbaycan Oftalmoloqlar Cəmiyyətinin Gənc Oftalmoloqlar Komitəsi tərəfindən keçiriləcək və iki gün davam edəcək, həmçinin iki böyük tədbiri birləşdirəcək “GOK-2023” Bakı şəhərində, Akademik Z. Əliyeva adına Milli Oftalmologiya Mərkəzində baş tutacaq.
XV Azərbaycan Gənc Oftalmoloqlar Konfransında müasir oftalmologiyanın müxtəlif subixtisaslarını əhatə edəcək məruzələr təqdim ediləcək. Beləki, gənc mütəxəssislər buynuz qişa, katarakta və refraksion cərrahiyyə, okuloplastika, okulyar travmatologiya, okulyar onkologiya, neyrooftalmologiya, tibbi və cərrahi retina, pediatrik oftalmologiya və çəpgözlük, optika və refraksiya, okulyar infeksiyalar, həmçinin uveitlər mövzusunda özündə elmi yenilikləri ehtiva edən çıxışları konfrans iştirakçılarının diqqətinə təqdim edəcəklər. Konfransda gənc oftalmoloqlarla yanaşı, oftalmologiyanın sirlərinə yenicə yiyələnməyə başlayan həkim-rezidentlərin də fəal iştirakı nəzərdə tutulur.
Azərbaycan Gənc Oftalmoloqlarının I Forumu XV Azərbaycan Gənc Oftalmoloqlar Konfransından sonra, 25 noyabr 2023-cü il tarixdə, günün ikinci yarısı keçiriləcək. İlk dəfə belə formatda təşkil ediləcək tədbirin əsas məqsədi gənc mütəxəssislərin qarşılaşdığı problemləri dinləmək, beynəlxalq oftalmoloji aləmdə gənclərin professional inkişafına yönəlmiş faydalı resursları onların diqqətinə çatdırmaq, praktik oftalmologiyada kövrək addımlarını atan gənc oftalmoloqlara bu sahədə artıq sözünü demiş, müəyyən bilik və təcrübəyə malik mütəxəssislərlə fikir mübadiləsinin həyata keçirmək üçün şəraitin yaradılmasından ibarətdir.
Azərbaycan Gənc Oftalmoloqlarının I Forumu Akademik Z. Əliyeva adına Milli Oftalmologiya Mərkəzinin direktoru, Azərbaycan Oftalmoloqlar Cəmiyyətinin sədri, əməkdar elm xadimi, AMEA-nın müxbir üzvü, t.e.d. Prof. Elmar Qasımovun dəstəyi ilə təşkil ediləcək.
“Gənc oftalmoloqların professional inkişafında perspektivlər, beynəlxalq resurslar, problemlər və həll yollarının axtarışı” mövzusunda 3 saat davam edəcək tədbirdə gənc oftalmoloqların diqqətini cəlb edəcək müxtəlif mövzular Dr. Emin Əlihüseynlinin moderatorluğu ilə interaktiv şəkildə, forumun spikerləriylə forum iştirakçıları arasında müasir internet texnologiyalarının tətbiqi ilə məlumat və fikir mübadiləsi formatında həyata keçiriləcək. Forumda t.ü.f.d. Dr. Mirana Mirişova “Elmi işlə məşğul olmaq üçün nədən başlamalı”? Dr. İnarə Hacı “Elmi məqaləni necə yazmalı”? , Dr. Pərvin Ağayeva “Gənclərin professional inkişafı üçün beynəlxalq resurslar. ICO İmtahanları, ICO Fellowship proqramı, Edinburq Universiteti – Klinik Oftalmologiya üzrə onlayn magistr kursu üçün grant proqramı və s.”, Dr. Lalə Məmmədova “Avropa ölkələrində ixtisasartırma kursları və Fellowship təhsili barədə”, Dr. Xuraman Ramazanova “Hindistanda oftalmoloqlar üçün ixtisaslaşma. Kliniki və cərrahi təkmilləşmə üçün imkanlar”, Dr. Emin Ərəbov “MOM-da rezidentlərin fəaliyyəti, yaradılan şərait və onlarda praktik vərdişlərin formalaşdırılması” mövzusunda gənc oftalmoloqları maraqlandıracaq müxtəlif xarakterli mövzularla çıxışlar edəcəklər.
“GOK-2023” barədə əlavə məlumat əldə etmək üçün konfransın rəsmi veb saytına daxil ola bilərsiniz. www.tinyurl.com/azegok2023