Akademik Zərifə Əliyevanın 99 illiyinə həsr olunmuş Beynəlxalq Elmi-praktiki konfrans
Azərbaycan Respublikası Səhiyyə Nazirliyi, Akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin təşəbbüsü ilə 28 aprel 2022-ci il tarixdə Akademik Zərifə Əliyevanın anadan olmasının 99 illiyinə həsr edilmiş “Oftalmologiyanın aktual məsələləri” adlı elmi konfrans keçirildi.
Konfransı giriş sözü ilə Azərbaycan Oftalmoloqlar Cəmiyyətinin sədri, Akademik Zərifə Əliyeva adına Milli Oftalmologiya Mərkəzinin direktoru, professor Elmar Qasımov açdı. O, görkəmli oftalmoloq alim, ictimai xadim, Akademik Zərifə Əliyevanın elmi yaradıcılığından, onun oftalmologiya sahəsinə verdiyi töhfələrdən, oftalmologiya elminin inkişafında müstəsna xidmətlərindən söz açdı. Daha sonra Akad. Zərifə Əliyeva adına MOM-un elmi işlər üzrə direktor müavini, t.e.d. Hicran Namazova Zərifə xanımın elmi yaradıcılığı barədə məlumatları iştirakçıların diqqətinə çatdırdı.
Konfransda Akademik Zərifə Əliyeva adına Milli Oftalmologiya Mərkəzindən, Əziz Əliyev adına Azərbaycan Dövlət Həkimləri Təkmilləşdirmə İnstitutundan, Azərbaycan Tibb Universitetinin Göz Xəstəlikləri Kafedrasından, digər özəl və dövlət təşkilatlarından, regionlardan mütəxəssislər iştirak etdi.
Fotoda sağdan sola: Dr. Emin Əlihüseynli Müasir Oftalmologiyanın İnkişafına Yardım Birliyinin sədri, Dr. Yazgül Abdiyeva Azərbaycan Oftalmoloqlar Cəmiyyətinin sədr müavini, Dr. Hicran Namazova Akad. Zərifə Əliyeva adına MOM-un elmi işlər üzrə direktor müavini, Dr. Leyda Kazımova Azerbaycan Tibb Universitetinin Tədris Cərrahiyyə Klinikasının mütəxəssisi, Medical Media şirkətinin direktoru, Dr. İmran Cərullazadə Funda Oftalmologiya Mərkəzinin baş həkimi.
Konfransda həmçinin Türkiyədən – TOD Onursal Başkanı Dr. Sunay Duman, TCOD-un Baş katibi Prof.Dr. Süleyman Kaynak və digər mütəxəssislər də çıxış etdilər.
Zərifə xanım Əliyevanın zəngin elmi irsi Azərbaycan oftalmologiyasına mühüm töhfələr verib. Onun bu irsinə sadiq qalaraq Azərbaycan oftalmologiyası inkişaf edib və bu yolda irəliləməyə davam edir. Konfransda müasir oftalmologiyanın aktual olan problemlərinə həsr olunan məruzələr dinlənildi.