Azərbaycan Retinoloqlarının VII Konfransı Lənkəran şəhərində keçirildi

03 dekabr 2022-ci il tarixdə ölkəmizin dilbər guşəsi olan Lənkəran şəhərində yerləşən “Lankaran Springs Wellness Resort” hotelində Azərbaycan Retinoloqlarının VII Konfransı baş tutdu.

Konfransda məsləkdaşlarımız bir-birindən maraqlı məruzələr, klinik hallar və əməliyyat videolarını iştirakçıların diqqətinə təqdim etdilər. Konfransın maraqlı və zəngin elmi proqramının hazırlanmasına görə Dr. Lalə Axundovaya, Dr. Müşfiq Kərimova və Dr. Xalid Əliyevə, həmçinin yüksək səviyyəli və professional təşkilatçılığa görə Dr. Yazgül Abdiyevaya və Dr. Ceyhun Nəzərliyə, eləcə də konfransın ərsəyə gəlməsində əməyi olan lakin adını çəkmədiyim hər kəsə xüsusi minnətdarlığımızı bildirirk.

Müasir Oftalmologiyanın İnkişafına Yardım Birliyinin sədri Dr. Emin Əlihüseynli konfrans zamanı Amerika Oftalmologiya Akademiyasının “Diaqnose this” bölməsinin Azərbaycan dilinə tərcümə olunmuş “Diaqnoz qoy” layihəsinin və interaktiv məruzə sisteminin təqdimatını iştirakçıların diqqətinə çatdırdı, həmçinin gözəl tərcümələrə görə Dr. Firangiz İbrahimovaya təkrar öz minnətdarlığını bildirdi.

Maraqlı məruzələr və onların müzakirələri, qarşılıqlı fikir mübadiləsi ilə, dostluq və qardaşlıq atmosferində keçən, həmçinin zəngin sosial proqramı ilə iştirakçıların xatirəsinə həkk olunan konfrans ölkəmizin müxtəlif mərkəzlərində çalışan oftalmoloqlarımız tərəfindən çox yüksək qiymətləndirildi.